Sapa nuan bujang..

sapa meh nuan bujang?

ti udah nulis janji semaya enggau Petara,

ngambi kumangbaik nyadi ke bini..

sapa meh nuan bujang ungkup kumangbaik nyadi ke laki?

sapa meh nuan bujang ti selalu di ambik mimpi, ngerugak malam ti belabuh sunyi?

sapa meh bujang ti udah bejanji deka segulai sampai ke tuai, begulai sampai ke mati?

kumangbaik udah nganti bujang datai lalu enda datai..



mua sigat nuan bujang ayas ba mata,

nama kebuah ku enda ngelala nuan sapa?

sada nyawa nuan rapas di dinga,

nama kebuah ku enda ngelala nyak sada nyawa sapa?

dalam mimpi tua beperening mata,

nama kebuah ku enda ulih maca isyarat perening mata nuan bujang?

dini meh nuan bujang belalai enda segaut ngambi aku pulai?

dini meh nuan bujang ti besemaya ngambi kumangbaik ke bini,

lebuh bungai benung ngerembai,

lapa bujang enda datai netap ke semaya lama udah dipegai?

nama kebuah ati begeremai?

lebuh ngingat ke bujang tampun puji..

nama kebuah ati beraie?

lebuh ngingat ke bujang sulu ati..



oo..Petara ti ninga sada nyawa..

jaga meh iya ti digaga Nuan ke laki kumangbaik..

anang ngasuh iya rindang meda dara ti ukai diungkup Nuan ke iya..

beri meh iya mimpi ngingat ke janji..

ngambi kumangbaik nyadi ke bini..

tunjuk ke pejalai kaki iya nuju kumangbaik dara ti udah seruran nganti..

Nuan Petara ti ngatur pengerindu kumangbaik enggau iya

datai ke seduai segulai sejalai pengerindu sampai ke belama ia..