Nama kebuah ai mata labuh keberai enti enda ketegal sayau ke nuan sulu ati di sayau kumang..
Anchur luluh di dalam dada ingat ke pengasih serta pengerindu nuan tampun puji kumang ..
Kasih meh kumang tuk ambu ati..sampai mati beraie ngiga pengerindu ari nuan.. lesi tubuh layu sulai nganti maya ulih begulai..
Dinga meh sebana kumang ati nuan suba ti enda ulih mutar ke maya.. ngajih ke ari bepun baru ari mula…
Dini meh alai kumangbaik ngiga ganti pengasih nuan ambu.. nukar penyayau nuan ngena nyawa kumang..
Dini meh alai kumangbaik ulih ngiga penyiru ati baka nuan tajau disayau kumang taja bejalai serata dunya..
Dini meh kumangbaik ulih ngiga sada nyawa nuan ambu ke selalu madah ke diri sayau ke kumang sampai ke nyawa lesi..
Dini meh kumangbaik ulih tetemu ke perening mata ti siru penuh enggau pengerindu ke kumang..
Sampai ke sarituk.. senayau jaku nuan peremban ati kumang mekang seruran ba ati peruji kumangbaik..
Jaku siru penuh pengerindu, “kumangku ti manis serta bajik”
Perekuh tubuh nuan ambu ati kesayau kumang mengkang berasai ba dada..asai ke baru tadi begulai..
Dini meh kumangbaik ulih tegiga ke mua manis ti selalu ngasuh ai mata kumang labuh keberai ketegal nuan sayau..

Pengasih Tuhan ke nuan peremban ati kumang lebih besai sampai ke tua beserara lebuh maya kumang agi belala begulai enggau nuan ba dunya nyata..
Pengerindu Tuhan ke nuan lebih dalam sampai ke tua putus pejalai segulai sebedau kumangbaik malas penyayau nuan sayau, ke kumangbaik..
Pengeran ati Tuhan ke nuan lebih tinggi sampai ke tua badu agi segulai sejalai sebedau kumangbaik nemu madah ke penyayau kumang ke nuan enggau pengabis ati..
“Kumangbaik sayau ke nuan intan belian disayau kumang..”

Sarituk ati kumang pemadu lelenggau ke nuan sayau..
Lebuh maya kumang nyabak berambun ke ai mata nadai meh agi jari nuan ambu ti selalu ngendas ai mata kumang..
Lebuh maya kumangbaik penuh enggau tuchum ketawa nadai meh agi sium pengasih nuan ba kuyu kumangbaik..
Ambu ati kumang.. nuan diatu nadai dipeda mata kumang tang pengerindu nuan mengkang menuh ke peruji ati kumang..
Jaku ajar serta puji nuan peremban dalam kumang.. mengkang besai menuh ke tungkul ati kumang..
Sepemanjai umur nuan peraja mata kumang, nuan besampi ngagai Petara ke pemujur kumang..
Diatu dinga ambu ati ti disayau kumangbaik.. enggau sada nyawa pegerindu ke nuan..
Kumangbaik meri leka jaku penyayau ke nuan sayau..
Ngambi ke nuan nemu pemesai pengerindu kumang ke nuan ba dunya tuk..
Taja dunya bebali, pengerindu kumangbaik ke nuan enda putus enda luluh..
Nyawa kumangbaik pan enda teganti ke pengerindu nuan ambu..

Terima kasih indai..
Ketegal nuan ti udah ngada ke kumangbaik ke dunya..
Ketegal ai mata nuan ti udah naya nanggung pemerinsa besabung nyawa meri pengidup ke kumangbaik..
Diatu kumang nuan tuk indai udah besai serta bajik baka nuan..
Nyimpan ati ti kering serta penuh pengerindu baka nuan..
Dinga meh indai sada nyawa kumang ba angin lalu.. meri besai terima kasih ke nuan..
Lebuh maya ari pengada kumangbaik sekali tuk.. ba angin lalu kumang nabur bungai tanda penyayau ke nuan indai
Taja tua enda segulai agi ba dunya nyata.. kumangbaik besampi tua betemu baru ba Rumah Apai di Serga.